Athena
Griechenland Teil II - Vom Stadtrand bi Perama a Piräus vrby iz Zentrum nach Metaxgourgio, uf Kipseli u vo dert nach Psyri u wieder zrügg nach Excharia, e Abstächer nach Plaka, Kolonaki u Thiseio, über Pangrati uf Koukaki, nach Monastraki und widr zrügg uf Piräus
Outos, Roller und Bösse chöme vo aune Site, dr chaotisch Stadtverkehr in Athen isch nüt für schwachi Närve. Scho bim Inefahre wird klar, Athen isch definitiv ke Velostadt. Es git ke Velowäge u d'Outos und Roller hei hie klar Vortritt. D'Grössi vo dere Stadt isch imens. Vom Stadtrand bi Perama bis iz Zentrum fahre mer 17 Kilometer bis zu üsem zentral glägene Airbnb. Mir schlängle üs düre Fyrabeverkehr und versueche mit däm Chaos z'schlag z'cho. Mir hoffe uf d'Chräft vor Schutzgöttin Athena. Heil acho bim Airbnb, freue mir üs nach 20 Täg übernachte im Zäut uf d'Vorzüg vore Wohnig. Mir näme d'Velos mit id Wohnig, ab iz si mer für es paar Täg z'Fuess und mit ÖV ungerwägs.
Mir hei üs vorgno, Athen Quartier für Quartier z’entdecke. Mir nämes gmüetlich und chilles o immer widr lenger i eim vo viune entspannte Kaffis. Mir entdecke schöni Ussichtspünkt, loufe dür unzähligi Strasse und dürquere es paar Pärk. Immer mau wieder toucht zwüsche zwöi Hüsereihe am Horizont d’Akropolis uf. Mir esse bewusst chli diverser und gniesse d'Viufaut vo Restaurants - sigs italienisch, indisch, georgisch odr o syrisch.
Athen bietet e einzigartigi Mischig us auter Gschicht u moderner Hektik. Näbscht eme churze Abstächer uf d'Akropolis ergäbe sech verschidnigi kulturell spannendi Glägeheite. E Fiumvorstellig über nes soziaus Skate-Projekt im ne Openair Chino, e Fotousstellig über Velofahrendi in Athen odr es Musig-Festival mit verschidnige lokale Bands im Kulturzentrum von Athen. O z'Stadtderby zwüsche Panathinaikos und Olympiakos findet i dene Täg statt, was mer üs nid löh lah entgah. D'Stimmig isch o ohni gägnerische Fans guet gsy (in Griecheland nid erloubt bi Hochrisikospiu) - nume z'Resultat mit eme 0:0 nid so reizvou.
Süsch gits z'übleche Stadtprogramm: Wösche, Velo-Service, Vorrät uffüue u Route plane. Lang wüsse mer nid gnau wos aus nächschts söu häre gah. Mir würde gärn gah häufe bir Oliveärnti, wo i de nächschte Wuche startet. Mir hei verschidnigi Orte agfragt und hei o immer widr telefonische Ustusch. Öbs de wük klappe wüsse mer no nid, wüu zytlech vili ersch im November mit dr Oliveärnti starte.
Nach 10 Täg in Athen hei mir viel Egge und Facette vo dere Stadt kenneglehrt. Mir hei lang nid aues gseh, aber gnue, um üs scho chli meh aus nume Tourischte z'füehle. Am Morge am 5i stöh mer uf und durchquere no bi Dunkuheit Athen mitem Velo in Richtig Hafe vo Piräus. Vor Fähri us verabschiede mir üs bi eme Sunneufgang mit eme nä letschte Winke vo Athen - e Stadt zwüsche Charme und Chaos.
Karte vo Athen
✉️ Blog Updates: Mäud di hie ah, we de über nöi Biträg wosch informiert wärde.