Paralia
Griechenland Teil I - Vo Igoumenitsa ar Küschte entlang nach Siviota witer uf Parga und Preveza quer über Lefkada nach Kefalonia einisch rundum vo Sami nach Patras ar nördleche Küschte vom Peloponnes entlang nach Korinth witer in Richtig Athen
Griecheland begrüesst üs mit eme schöne Usblick uf z'Meer begleitet vo liechtem Räge. I üsne Rägechleider und eme breite Lache ufem Gsicht starte mir üsi Route iz ds Land mit über 6’000 Insle. Mir freue üs uf z'Meer, d'Küschte, z'Ässe, d'Lüt u viu me. Ersch e Tag spetr merke mer, dass mer mitem Überquere vor Gränze o ine angeri Zytzone gfahre si. Egau, Zyt isch gnue vorhande und mir hei keni Termine ussert, dass mer iz Meer wei gumpe und a Strand wei lige.
Nach über 14 Fahrtäg am Stück steit definitiv e Pouse a. Mir lege uf zwöi gmüetleche Campingplätz für je 4 Täg e Haut ih. Beidi mau hei mer Glück und bechöme e Platz z'vorderscht am Meer. I dene Täg näme mir üs Zyt zum Meer gniesse, Läse u Witerplane. Immer wider chöme mer iz Gspräch mit üsne Camping-Nachbare - die meischte si rund dopplet so aut wie mir. Aus einzige Velofahrerinne si mer d'Exote und es besteit es offekundigs Interässe wie mer so ungerwägs si. Abwächligswis beantworte mer di bereits oftmaus beantwortete Frage: "vo wo sit dir?", "wie lang sit dir scho ungerwägs?", "wo geits aus nächschts häre?" und "si ds Elektrovelos?".
Guet erhout fahre mer witer. Mir entscheide üs gäge di diräkti Route nach Athen und für ne Umwäg über di Griechische Insle Lefkada und Kefalonia. Üsi Strecki geit vo Paralia zu Paralia, sprich vo eim Strand zum nächschte - üses Zäut immer mit diräktem Blick uf z'Meer. Es isch nüm viu los, d'Houptsaison isch düre und Restaurants und Läde hei nume no vereinzelt offe. D'Strasse aber vorauem o d'Stränd si praktisch leer u mir hei viu Platz für üs. Mir gniesses sehr jede Tag iz Meer ga z bade und zum Rusche vom Meer izschlafe.
Kefalonia isch üses Highlight vo däm Streckeabschnitt. Türkisblaus Meer, wunderschöni Stränd für üs elei und einzigartigi Ussichte mache üse Abstächer uf dere Insle einzigartig. Drzue chunnt, dass mir während drü Täg mit Zoë und Quentin us Frankrich ungerwägs sy. Z’viert ungerwägs z'si isch e nöii Erfahrig, wo üs sehr gfaut. Ungerwägs uf de Strasse hei mer z'viert e angeri Präsenz und mir gwinne viu Inspiration dür die viele Gspräch vorem, währendem und nachem fahre. O zäme Schlafplätz a abglägnige Stränd z'entdecke, choche u Musig lose hett gfägt.
Nach üsem Abstächer uf Lefkada und Kefalonia geits wieder zrügg ufs Feschtland. Mir fahre ufem Peloponnes nach Oschte bis uf Korinth - just zum rächte Zytpunkt für z'beobachte wie es Schiff dr schmau Korinth-Kanal passiert. Je meh mir üs Athen nechere desto beläbter und verbouter isch d'Küste. Es brucht aber no zwöi witeri churzi Fährine bis mir dr Stadtrand vo Athen erreiche und mir d'Idylle und d'Rueh vor dere Strecki definitiv hingerüs löh.
Üsi Route dür Griecheland Teil I
✉️ Blog Updates: Mäud di hie ah, we de über nöi Biträg wosch informiert wärde.