Një, Dy, Tre
Albanien Teil II & III - Via Krumë ad di gstouti Drin uf Kukës witer nach Peshkopi, nach eme Abstächer uf Mazedonie nach Korçë u witer a di griechischi Gränze ar Vjosa entlang um d'Nemerçka-Bärge nach Gjirokastër az Mittumeer nach Sarandë när uf Ksamil
Një, Dy, Tre - alle guten Dinge sind drei. Zum zwöite u dritte Mau überquere mer mitem Velo d'Gränze nach Albanie. Zersch zwüsche Kosovo und Mazedonie und när nach Mazedonie in Richtig Meer.
I de Abanische Alpe rächne mir mit meh Tourischte und meh Verkehr. Mir wärde aber positiv überrascht. Irgendwie isch nid viu los. Mir si froh d'Strasse und d'Natur mehrheitlech für üs z'ha und freue üs über di fründleche Mönsche und di verschidnige Tier, wo mir uf u näbe de Strasse chrüze.
Mir fahre uf perfekt asphaltierte Serpentine, mir erkunde Dörfer wie Pershkopi, wo mer wit und breit di einzige Tourischte si, mir stune ab dr beidruckende Kulisse vo de Nemerçka-Berge und si beidruckt vor Vjosa eine vo de wenige no unberührte Flüss in Europa. Z Ziu vo üsere Strecki isch d Küste, di albanische Riviera. Je meh mir üs am Meer nechere desto touristischer wirds. Nahdisnah fahre üs immer me Reisecars, Mietwäge und Roller um d'Ohre. Uf üsem Wäg mache mer e Haut in Gjrokastra. Eini vo de eutschte Stedt vo Albanie. Di mittuauterlechle Boute und dr antik Basar si dütlech spekakulärer aus üse Camping vis-a-vis vore Tanksteu. Abr für paar Stunde Schlaf, Strom und e früschi Duschi totau ok.
Ir druffougende Etappe isches de sowit nach eme letschte Astieg gseh mir ändlich z' Meer. Nach 14 Fahrtäg am Stück sehne mir üs uf ne lengeri Pouse am Strand. Leider füehle mir abr üs ar Albanische Riviera nid wohl, es isch üs z touristisch und zu überlofe und z Wätter spielt o nid mit. Mir verlege üsi Pouse spontan um ne Tag witer abe i Süde a di griechischi Küschte.
Uf dene zwöi Streckine dür Albanie schlafe mir a einzigartige Orte. Mir Campiere wiud mit Usblick ufne Stousee, mir dörfe üses Zäut gratis näbem nä Hotel direkt am See ufsteue, lehre ufem Camping bi Permet z Huus-Schaf kenne und wärde im Garte näbemne Mini Market mit schönster Ussicht ufs Meer iglade.
Ungerwägs si mer scho wie bim erschte Teil in Albanie immer widr beschänkt worde. Ei Buur hetts bsunders guet gmeint. Es git 20-30 Zwätschge, 4 Öpfu, 2 risigi Bärge wissi und roti Trube - aues früsch vom Fäud. Faleminderit! Nid nume d'Frücht si fein, o süsch z'Ässe isch köschtlech und abwächsligsrich. Mir probiere geng wieder nöis us. Auternativ gits emu sicher i jedem no so abglägene Dorf e Burek. Absoluts Highlight isch Trileçe, e Art Miuchchueche mit Caramel-Sauce obe druf.
Albanien het üs i verschiedener Hisicht sehr gfaue und beidruckt: D Mönsch und iri gastfründlechi Art, d Natur und ir Vielsitigkeit und z Esse und die grossi Abwächslig.
Üsi Route dür Albanie Teil I, II & III
✉️ Blog Updates: Mäud di hie ah, we de über nöi Biträg wosch informiert wärde.