Oh Ohrid!
Mazedonien - Vo Debar ar Drin entlang zu ihrer Quelle uf Struga ume Ohridsee nach Ohrid und witer am Wasser nah
Im Vorfäud hei mir scho einiges übere Ohrid See ghört, dr zwöitgrösst See im Balkan. Iz wo dä See und ds für üs no unbekannte Land i erreichberer Distanz liege, hei mir gwüsst, das mir dä Abstächer wei mache. Mir freue üs u wärde ar Gränze vo dr "Sonne der Freiheit" uf dr mazedonische Flagge begrüesst.
Nachere längere Tagesetappe und ungfähr 20km nach dr Gränze erreiche mir dr Ohridsee. Hie hei mir wieder mau Glück. Mir entscheide üs kurzfristig nach Achunft ufemne Campingplatz, wo mer üs usegschribe hei, no witer z'luege und witer am am See entlang z'fahre. Mir finde e wunderschöne chline Camping, wo komplett läär isch. D'Saison sig verby meint dr Campingwart, aber mir söue üs gärn e Platz ussueche. Mir chöi üses Zäut diräkt am See ufsteue und gönne üs es entspannts Znacht mit Blick ufe See.
Dr nächscht Tag startet mit Räge und spannende Gspräch mit verschidnige Locals, wo ufe Camping chöme cho käffele. Es isch interessant, wie viu Lüt im Usland gschaffet hei und när uf d'Pensionierig widr zrügg i ihres Land chöme. Aber o Politik wird i de Gspräch agschnitte. Grundtenor: Es bringt eh nüt, di si aui korrupt und mache was si wei. E Widerholig vo däm, wo mer i de angere Balkanländer immer widr ghört hei.
Z'Velofahre am Ohrid See entlang isch entspannt und füehrt üs über chlineri Strasse iz Touri Gwimmu vo Ohrid. Z'Städli isch sehr schön und drum es sehr beliebts Ziu für Tourischtegruppe us de ungerschidlechschte Länder. Mir si froh isch Näbesaison, mir chöi üs nid vorsteue wies im Juli und August wäri. Mir gniesse z'feine Ässe und chilles bis i Abe am Wasser.
Es isch e churze Iblick gsy und mir hei nur dr Egge ungge linggs gse, e ganz spezifische Teil vo Mazedonie. Leider ligt dr Räscht vom Land genau i dr entgägegsetzte Richtig, drum geits "back to Albania", mir fahre zum dritte Mau zu eme albanische Gränzübergang.
PS: Warum schribe mer vo "Mazedonie" statt "Nordmazedonie"? Für e Mehrheit vo de Lüt in Mazedonie isch dr Namenswächsu nie wük gwünscht gsy. Dr Zuesatz "Nord" isch nume hinzuegfüegt worde, damit Griecheland nach eme jahrelange Stritt ihres OK für d'EU Bitrittsverhandlige git. Was de abr bis hüt glich nid passiert isch...
Üsi Route dür Mazedonie
✉️ Blog Updates: Mäud di hie ah, we de über nöi Biträg wosch informiert wärde.