Falëminderit
Albanien Teil I - Dür z Prokletijedi Gebirge nach Tamarë witer uf Shkodër, witer uf Koman mit dr Fähri nach Fierzë und ar Valbona entlang in Richtig Kosovo
Mit dr Gränzüberquerig nach Albanie touche mir sprachlech ine komplett neui Wäut ih. Irgendwie dütlech schwiriger aus Serbokroatisch, was us viu chürzere Wörter besteit. Përshëndetie, Falëminderit, Parfshim. Nach paar Täg chöi mer immerhin "Hallo", "Merci" u "Ade" säge. Ds schetze d'Lüt sehr. Sie freue sech über jedes Wort gebrochnigs Albanisch wo mer vo üs gäbe, o we d'Betonig chum dörft stimme - insbesondere vo däm "ë".
In Albanie wärde mer i aune mügleche Situatione iglade und üs wärde au pott Ässe u Getränk abote. Üs blibt de hüfig nid viu meh übrig aus es paar mau "Falëmenderit" z wiederhole. We mer aui Iladige hätte agno, wäre mer äuä für paar Mönet in Nordalbanie blibe, drum si mer näbscht eme Rakja und eme Cola bi ere grössere Asammlig vo Albaner ir Dorf-Beiz i de meischte Fäu mit eme fründleche "Falamiderit" witerzoge. Mir si beidruckt vo dene ungloublech gaschtfründleche Mönsche.
Sowieso hei mer z'Gfüu, freue sech d'Albanerinne u Albaner üs z'gseh. Us aute wie us nöie Mercedes Modell wird üs zuegwunke, zuegrüeft und zueghuepet. Paar angeri Outomarke gits o no, die si abr eher ir Ungerzau hie. Anders aus erwartet isch dr Verkehr rächt verträglich und Outo lö üs mehrheitlich Platz. Nume hie und da müesse mir e Boge um ne Chue, es Schaf oder es Ross mache, wo sech nid us dr Rueh löh lah bringe.
In Shkodër, dr viertgrösste Stadt vo Albanie, mache mer widr mau es paar Täg Pouse. Mir si umgäh vo Velofahrer:inne, insbesondere euteri Lüt fahre mit ihrne roschtige u schlächt pumpte Velos dür di outofrei Autstadt. Mir träffe in Shkodër o widr üsi Bikepacker Friends Amrei & Mo und gäbe üs gägesitig Updates zu de Erläbnis vo de letschte Täg.
Nach paar Täg chille und eme Veloservice (losi Schrube azieh und Pneu pumpe) geits de witr Richtig Hinterland vo Albanie. Mir fahre ar Drin entlang zu eme grosse Stoudam. Vo dert us geits mit ere chline und überfüute Fähri ufe Koman See. D'Fähri füehrt üs über e 33 Kilometer längi Strecki dür eini vo de schönschte Schluchte vom Balkan.
Nach dene schöne Idrück u Erläbnis freue mir üs spetr no witeri Landesteile z'erkunde.
Üsi Route dür Albanie - Teil I vo III
✉️ Blog Updates: Mäud di hie ah, we de über nöi Biträg wosch informiert wärde.