Trans Dinarica
Montenegro - Über d’Tara iz dinarische Gebirge quer düre Durmitor Nationalpark nach Žabljak witer dür d'Bärgchetti vo Kuline i Skiort Kolašin dür Andrijevica ar Lim entlang über Plav nach Gusinje
Nachem Überquere vor Gränze isches unmittubar steil ufwärts gange. Mir hei üs immer meh i abglägeni Gebiet und immer töifer i di Dinarische Gebirge begäh. I dene abglägene Orte blibt teilwiis Zyt fasch sta. So si mer ufem Camping Jugoslavija, bi üsne erschte zwöi Übernachtige id Zyte vom Tito versetzt worde.
Vili steili Anstiege u schöni Abfahrte si i dene Täg ufem Programm gstange. Dr Durmitor Nationalpark isch nume eis vo viune Highlights gsy. Mir si zwüschezytlech abr o a üsi Gränze gstosse, wo mir e Hochebeni mit ändloser Schotterpischte überquert hei und komplett si düregschüttlet worde.
Obwohl mir dür vili mönschelääri Landschafte si gfahre, si mir doch einige Mönsche begägnet und hei sogar e handvou Veloreisendi troffe. So wie d'Amrei u dr Mo, wo ide Ferie mehreri Etappe vor Trans Dinarica si gfahre. Nachdäm me sech ungerwägs immer widr krützt hett, hei mer de mehrmaus zäme gässe und zäme Zyt vrbracht. Locals hei üs e Iblick i ihres Land hei gäh. Katharina het üs meh über z Läbe in Montenegro, irne Tröim nach dr Schu und über Gschicht vor Teefabrik vo irem Vater verzeut.
Mir hei o gmerkt, dass i dere Abgschiedeheit anderi oder gar ke Regle gäute. Bim Wiudcampe hett üs churz vorem Ischlafe e lute Knau ufgschreckt. Mir hei de gseh, wie i unmittubarer Nechi es paar Männer mit Gwehr und Taschelampe im ne Pickup uf dr Jagt si und usem fahrende Outo schiesse.
Angers aus planet si mer dank verschidnige Empfählige nid id Houptstadt Podgorica gfahre, sondern i de Bärge blibe und hei z'Land entlang vor Trans Dinarica dürquert.
Üsi Route dür Montenegro
✉️ Blog Updates: Mäud di hie ah, we de über nöi Biträg wosch informiert wärde.