Mix of everything
Bosnien Teil II - Vo Bistrik nach Baščaršija nach Stari Grad iz Centar u widr zrügg quer dür Sarajevo witer über Miljevina nach Foča
Ir grösste Hitz si mir mit Vorfreud uf e Pouse und chli Abchüelig in Sarajevo acho. Mehreri Locals hei üs Sarajevo aus "mix of everything" beschribe.
Die Täg in Sarajevo si o im Sinn vo üsem Programm e mix of everything gsi: Mir hei üs im Chaos vom orientalische Stadteil verlore und hei im moderne Bagelshop üse nächste Routeabschnitt plant. Mir hei d'Stadt us moderne Gondeli vo obe bestuunt und si über die auti Bobbahn vo de Olympische Spiel 1984 glofe. Mir hei zwüsche Chile und Mosche im Openair Chino d'Vorpromiere vom Sarjevo Filmfestival gseh. Mir hei Türkische Kaffi trunke und vegetarischs bosnischs Esse usprobiert. Mir si mitem aute Tram gmüetlich queer dür d Stadt gfahre und mitem Taxi i viufacher Gschwindigkeit zrügg az angere Ändi vor Stadt graset. Mir si immer widr i d'Gschicht vo Sarajevo abtoucht und hei bi unzählige Cappuccinos mit Hafermilch Bilder usegsuecht und dä Blog erstellt.
O d'Begägnige mit Mönsche hei die Wuche speziell gmacht. Mir hei dr Simon troffe, e Bikepacker, wo üs mit sire Art und sine Reiseplän inspiriert hett. Bi Znacht und witere Träffe hei mir üs über üsi Route u Erläbnis ustuscht. Dr Nino, e Bikeshop-Bsitzer us Sarajevo, het üs ines spontans u schlussändlech sehr längs Gspräch verwickelt. Är hett dr Bosniechrieg uf dr Site vo de muslimische Bosniake erläbt und viu bewegendi Gschichte verzeut.
Us plante vier Täg in Sarajevo si am Schluss de sibe worde. Nach dene Täg isch d Vorfreud gross gsi, wieder i d'Natur z stäche, früschi Luft iz schnufe und dr Südoschte vo Bosnie z'entdecke. Üsi witeri Route het üs dür Gebiet vor Republika Srpska gfüehrt und üs nomau di komplexi Situation vo Bosnie ufzeigt.
Uf dr letschte Etappe si mer dür di beidruckende Schluchte vom Sutjeska Nationalpark gfahre. Nach eme munzige Gränzposchte hett üs e eispurigi Brügg über e Fluss Tara nach Montenegro gfüehrt.
Üsi Route dür Bosnie
✉️ Blog Updates: Mäud di hie ah, we de über nöi Biträg wosch informiert wärde.