Ipak yo'li
Usbekistan - Vo Nukus uf de Spure vor aute Sidestrass nach Khiva, u witer mitem Zug via Bukhara nach Samarkand und vo dert uf Tashkent.
Karakalpak-was? Zwöi Täg bevor mir nach Usbekistan reise, erfahre mir, dass üses erschte Reiseziu ire autonome Region isch und immerhin rund 2 Millione Iwohner hett. In Karakalpakistan gits näbscht ere eigete Sprach u Flagge o e Houpstadt namens Nukus - üse erscht Stopp in Usbekistan.
Vo hie us lege mir di erschti Strecki mitem Velo zrügg. Mir fahre zwöi Täg entlang vo grade Strasse und ändlose Steppe. D'Strasseverhäutnis schwanke zwüsche sehr guet bis sehr schlächt, was zwüschezytlich nüm so fägt. Was üs uffaut isch, dass mir nid die einzige ufm Velo si. Z'Velo schint es beliebts Fortbewegigsmittu z'sy - vor auem bi eutere Herre. Öpis witers wo üs uffaut, si di vile wiise Outos. Bim gnauere häreluege merke mir, dass fasch aui glich usgseh. Chli spetr verzeut üs de öper, dasses in Usbekistan mehreri Chevrolet Fabrike git und die Outos hie üsserscht günschtig z'choufe si. Rund 90% vo de Autos uf de usbekische Strasse si vo Chevrolet - verteilt uf vier bis füüf verschidnigi Modäu. Üses Lieblingsmodäu si d'Damas. Chlini Büsli, wo z'Strassebiud präge. D'Velos u d'Autos si hüfig voubepackt mit Ware - immer wieder gseh mer aui mügleche Sache druf u dra bunde.
Khiva isch üse nächscht Haut ar Sidestrass (Ipak yo'li) und isch dr Afang vo witere historische Stedt, wo mir bsueche. Mir bestune es erschts mau wunderschöni Moschee, blaui Mosaikmuschter und auti Stadtmuure. Mir füehle üs zrügg versetzt ine angeri Zyt. Basierend uf verschidnige Podcasts zur Gschicht vor Sidestrass steue mer üs vor, wie dr Marco Polo hie mit ere Karawane näbe üs dürezieht. Zrügg ir Gägewart gspüre mer mau widr d'Vorteile vom Reise ir Näbesaison. Näbscht es paar usbekische Tourischt:inne si mer wit u breit di einzige hie. Mir loufe dür di änge Gässli und vergwüssere üs über d'Qualität vo de üsbekische Mütze, wo hie aui Männer trage.
Ufgrund vom chaute Wätter, de riesige Distanze u dr eitönige Steppe entscheide mir üs vo Kihva mitem Zug witer z'reise. Ds mau verwütsche mir bsunders viu Komfort und gniesse üses 4er-Abteil ir erschte Heufti vor Fahrt z'zwöit - chli läse, Tee trinke und id Ferni luege. Ir zwöite Heufti stigt es euters usbekischs Päärli zue. U sofort erfahre mir di überschwänglechli usbekischi Gastfründschaft. Si packe ires säuber gmachte Fladebrot us und teiles mit üs. Obwou mir üs chum chöi verständige, schaffe mirs glich üs z verstah und heis zäme luschtig. Dür si lehre mir o wie mä richtig und schnäu Sunneblumekärne mit de Zähn vo dr Schale trennt, was vor Türkei bis Usbekistan wit vrbreitet isch.
Uf Khiva fouge mit Buchara und Samarkand witeri Stedt, wo ar aute Sidestrass lige. Mir touche ab i di idrücklechi Vergangeheit und löh üs lah tribe zwüsche Moschee, Madrasas und de vile verschidnige Basars. O mitem Märde ufem Basar sammle mer Erfahrige. Nach 15 Minute und eme dütleche Prisabschlag packe mer zfride üse neu erstandnig Teppich ih. Leider isches ke flügende, aber wie mer spetr erfahre sigs e guete Deal - immerhin! A unzählige Ständ wird z'bekannte Samarkand Brot abote. Zum Teil o grd diräkt usem heisse Ofe. Mir löh üs immer mau widr vom früsche Brotduft lah verleite und gönne üs so es runds Wunderbrot.
D'Usbekinne und Usbeke si sehr fründlech, offe und interessiert. Mir chöme schnäu mit ihne i Kontakt und o we wük niemer vo ihne English cha. Zwüsche entdecke und aluege - ipackt i au üsi Chleiderschichte - hocke mir zum üs Ufwerme i Kaffis und Teehüüser. Eine vo de wenige Tourischte wo mer in Usbekistan träffe, isch dr Hailong. Är isch us China und wohnt in Peking. Mir tusche üsi Kontaktagabe us, wär weiss villech wärde mir ihn spetr uf üsere Reis nomau gseh.
Widr näme mer dr Zug und fahre uf Tashkent, id Houptstadt vo Usbekistan. Hie erwarte üs unagnähm viu Smog und ganz viu Soviet-Vibes. Mir fahre mit dr Metro ume und bewundere di schöne und einzigartige Statione, wo Tashkent drfür bekannt isch. Mir si üs no nid sicher wies witer geit. Mir hei Luscht uf z'Velofahre und prüefe verschidnigi müglechi Route. Entweder nördlech nach Kasachstan oder villech glich dür z'Fergana Tal in Richtig Kirgistan - mau luege...
✉️ Blog Updates: Mäud di hie ah, we de über nöii Biträg wosch informiert wärde.